कानूनी सहयोग तथा परामर्श केन्द्र (ल्याक) सन् १९८७ मा स्थापना भएको एक गैर सरकारी संस्था हो । यस संस्थाले स्थापनाकाल देखि नै निरन्तर रुपमा महिला तथा बालबालिकाको न्यायमा पहुँच अभिवृद्धि, महिला सशक्तिकरण, नेतृत्व विकास तथा क्षमता अभिवृद्धिका लागि काम गर्दै आएको छ ।

यस संस्थाका संस्थापक अध्यक्ष प्रा.डा. शान्ता थपलियाले आफ्नो विद्यावारिधिको शोधपत्र तयार गर्ने क्रममा नेपालका धेरै गाउँबस्ती जाने क्रममा महिलाले भोग्दै आएका लैंगिक हिंसा, यौनिक हिंसा, विभेद, चेतना अभाव र विभेदकारी कानूनको कारणले न्यायमा पहुँचको कहालिलाग्दो अवस्थाको प्रत्यक्ष साक्षी बन्न पुग्नु भएकोले त्यस्ता महिला तथा महिला संगसंगै पीडित हुन पुगेका बालबालिकाको न्यायमा पहुँच अभिवृद्धि गर्ने उदेश्यले यस संस्थाको स्थापना भएको थियो । तत्कालिन समयमा महिलाहरु हिंसा सहेर घरभित्रै बस्न बाध्य भएका र त्यसको विरुद्ध आवाज उठाउन नसकेका कारण उनीहरुको न्यायमा पहुँच पुर्याउन अति जरुरी महशुस गरेर कानुनी सहयोग तथा परामर्श केन्द्र ल्याकको स्थापना सन् १९८७ मा प्रा.डा. शान्ता थपलियाको नेतृत्वमा भएको थियो । महिलामाथि गरीएको विभेदपूर्ण व्यवहार, सबै प्रकारका हिंसा विरुद्ध आवाज उठाउने, महिलाको नेतृत्व विकास गर्ने तथा महिलाहरुको न्यायमा पहुँच सजिलै पुग्न सकोस् भन्ने उदेश्यका साथ यस संस्थाको स्थापना भएको हो । शुरुवाती दिनमा देशको राजनीति अवस्थालाइ मध्यनजर गर्दै संस्था मार्फत् अनौपचारिक रुपमा सेवा प्रदान गर्दै आउनुभएको र २०४६ सालको राजनीतिक परिवर्तनपछि देशमा प्रजातन्त्रको स्थापनासंगै औपचारिक रुपममा संचालक समिति गठन गरेर विधिवत् संस्था दर्ता गरी प्राध्यापक डाक्टर शान्ता थपलियाको निवासको तल्लो तलामा यस संस्थाको स्थापना भएको थियो । समाजमा रहेका सबै वर्गको समान अधिकारको कुरा उठिरहेको अवस्थामा संयुक्त राष्ट्रसंघबाट महिला माथि हुने सबै प्रकारका भेदभाव उन्मूलन सम्बन्धी महासन्धि (CEDAW) पारित भएको कारणले पनि महिलामाथि हुने हिंसा र महिला अधिकारका विषयमा आवाज उठिरहेको समयमा नेपालमा प्रजातान्त्रिक वातावरणमा धेरै नेपाली जनताहरुको विभिन्न सेवामा मानवअधिकार तथा विकासमूलक कार्यक्रम माग गर्न थाले ।